с.Кужба

Муöдз копыр, коми ань

Тайö аньсö Ыджыд Кужйын быдöн бура тöдö. Чужлiс-быдмис и нэмсö коллялiс тайö сиктас. Öнi Анна Григорьевна Тарабукиналы тырö нин 80 арöс. Кыдзи нö абу нимкодь, кор мамöс, бабöс ыджыд юбилейöн чолöмавны воласны быдтасъясыс — квайт ныв-пи да внук-внучкаяс. Бара челядь горöн тырлас керкаыс, налöн дзользьöмысь радлас аньлöн сьöлöмыс. А кутшöм нö аддзысьöм вермас лоны сёрни-баснитöг, а гöгрöс чужан лун пасйöм — важсö казьтыштлытöг.

Анна Григорьевналы эм мый йылысь висьтавны челядьыслы аслас олöмсьыс, öд та мында вонад мый пыр кö мунлöма да мындатор жö и тöдлöма. Мам-батьыс эз дыр лелькуйтлыны сiйöс, кок йылас сувтöмсяньыс на и уджö велöдiсны — то посни чой-воксö видзны, то горт гöгöрын бергавны. А сэсся колхозын мырсьöмыс унакодь сюрлiс война кадöдз. И, дерт жö, медся интереснö кывзыны олöма аньлöн висьтысь фронт вылын немечьяскöд воюйтöм йылысь. А веськавлiс сiйö санитарнöй ротаö Карельскöй фронт вылö. Некымын лунöдз тшыгъялöм, веськыда енэж улын, окопъясын узьлiгöн кынмалöм, тшын-би ньылалöм, жлеч пуляяслöн швичкöм — пöттöдз сюрлiс тöдлыны миян салдатъяслы. Казьтывлö, кыдзи пöсь тышъяс дырйи петкöдалiсны найö, санитаркаяс, би пытшкысь ас выланыс вынтöм-эбöстöм, ранитчöм боецъясöс. Мыйтакö мортöс и спаситiсны.

Быдса куим во эз пöрччыв шынельсö коми ань. Гортас воис победа бöрын нин, морöс вылас «За победу над Германией в Великой Отечественной войне 1941-1945 гг.», «За победу над Японией» да мукöд медальöн. Бергöдчöм мыстиыс паныдалiс ас сиктсьыс фронт вылысь жö воöм Митрей нима зонмöс. Ок и мичаа вopcic сiйö гудöкӧн. Гашкö, та вöсна и мусмис сiйö нылыдлы. И öтлаасисны. Öта-мöднысö пыдди пуктöмöн, радейтöмöн 50 сайö во нин олöны Дмитрий Андреевичкöд. Ныв-пиöс чужтiсны-быдтiсны, внук-внучкасö нин лелькуйтöны. Найö ставныс öнi чолöмалöны Анна Григорьевнаöс тöдчана лунӧн. Да и матысса тöдсаясыс тшöтш. Сиöны крепыд дзоньвидзалун, збодерлун да дыр на овны, нимкодьӧдны найöс.

Г. ИВАНОВА

  Парма гор, 1999, Апрель 6 лун.

 © Усть-Куломская межпоселенческая библиотека